Британскиот министер за надворешни работи во посета на Прага

Шефот на британската дипломатија Борис Џонсон денеска во Прага ќе разговара за последиците од одлуката на Велика Британија за напуштање на Европската унија (ЕУ).

Џонсон е предвидено да се сретне со чешкиот министер за надворешни работи Лубомир Заоралек и премиерот Бохуслав Соботка, јави дописникот на МИА од Прага.

Според најавите, посетата е дел од напорите на британската влада за да се утврдат ставовите на земјите членки на ЕУ и институциите на ЕУ околу претстојните преговори за уредување на односите меѓу Лондон и Брисел, по Брегзитот.

Дел од разговорите ќе биде посветен и на безбедносната и одбранбената политика, на борбата против меѓународниот тероризам и миграциската криза.

Процедурата за заминувањето на Велика Британија од ЕУ се очекува да трае две години. Чешката Влада во односите со Лондон става акцент на тоа чешките граѓани и по Брегзитот да имаат исти права на британскиот пазар како и Британците.