ФБИ ја отстрани заканата – нема обвинение против Хилари Клинтон

Американското Федерално истражно биро (ФБИ) само 36 часа пред претседателските избори во САД ја отстрани заканата што лебдеше над кандидатот на демократите Хилари Клинтон, објавувајќи дека таа не сторила кривично дело кога користелаи приватен сервер за имејл пораките додека била државна секретарка и дека не и се заканува обвинение.

Со ова ФБИ ги засили шансите на Хилари Клинтон во пресрет на изборот на кој гласачите треба да одлучат дали таа ќе биде првата жена претседател на САД, оценува Блумберг.

И додека Изборниот штаб на демократскиот кандидат соопшти дека им е „мило што ова прашање конечно е разрешено“, од таборот на републиканците порачуваат дека „тоа ништо не менува“ и дека истрагата на ФБИ „од почетокот е погрешно водена“, пренесуваат американските медиуми.

Директорот на ФБИ, Џејмс Коми, објави дека во новите мејлови, пронајдени на приватниот сервер на Клинтон не се пронајдени докази што укажуваат на криминални потези.

Во писмо до членовите на Конгресот, Коми наведе дека агенцијата ја завршила анализата на мејловите и дека не пронашла ништо што би го променило нивниот претходен став, односно дека нема елементи на основа на кои Хилари Клинтон би била соочена со обвинение.