Си-Ен-Ен: Трамп досега освои 244 места во Изборниот колеџ, а Клинтон – 215

Републиканскиот кандидат за американски претседател Доналд Трамп досега освои 244 места во Изборниот колеџ, а неговиот демократски противкандидат Хилари Клинтон 215, јави Си-Ен-Ен врз основа на проекциите од првичните резултати од претседателските избори во САД.

Трамп ќе победи во Јута и ќе ги освои тамошните шест изборни гласа, јави Си-Ен-Ен.

Трамп и натаму води во Мичиген, Висконсин, Аризона, Њу Хемшир, како и во Пеннсилванија. освен во државата Јута, во сите се преброени повеќе од 63 отсто од гласовите и ако Трамп сите ги освои, ќе добие дополнителни 67 изборни гласови. Со тоа, лесно ќе ја надмине бројката од неопходни 270 изборни гласа и може да стаса и до убедлива победа со вкупно 305 електорски гласови.

Трамп извојува победа во Алабама, Арканзас, Ајдахо, Ајова, Вајоминг, Западна Вирџинија, Индијана, Јужна Дакота, Јужна Каролина, Канзас, Кентаки, Лујзијана, Небраска, Мисисипи, Мисури, Монтана, Оклахома, Охајо, Северна Дакота, Северна Каролина, Флорида, Џорџија, Јута, Тексас и Тенеси, додека Клинтон победи во Вашингтон, Вермонт, Вирџинија, Делавер, Калифорнија,  Конектикет, Колорадо, Масечусетс, Мериленд, Илиноис, Невада, Ново Мексико, Њујорк, Њу Џерси, Орегон, Род Ајленд, Хаваи, како и во главниот град Вашингтон.

За победа на еден од кандидатите за претседател му се потребни најмалку 270 гласа во 538-члениот Изборен колеџ.

Во вкупниот број на досега преброени гласови Трамп освоил со 48,3 проценти, а Клинтон 47,1 отсто.